Просторы Вігорлатьской бібліотекы в Гуменнім были днешнім дньом, 9-го октобра, даны до реконштрукції. Про пресаґентуру TASR то увела бібліотека з тым, же прічінов реалізації проєкту за веце як 182.000 евр є значно невгодный технічный і гіґєнічный став дакотрых єй часті. Споминана реконштрукція буде ся дотуляти главні електроіншталації і підлогы в рамках цілого обєкту бібліотекы, котрый быв выбудованый в 70-ых роках минулого столїтя. В бібліотеці єдночасно прибудуть заряджіня на чістіня воздуху – ґерміцідны жіарічі, ці апараты на давкованя дезінфекчных средств. На проєкт з назвом Здравша бібліотека будучности здобыла Вігорлатьска бібліотека в Гуменнімскоро 173.000 евр з еврофондів, решту зафінанцує бібліотека з властных джерел. Роботы бы мали быти скінчены в новембрі того рока. (TASR, Pkf)