x

Пряшів собі припомянув 15 років од зряджіня Ґрекокатолицькой метрополії

00

Ґрекокатолици собі в суботу 28-го януара в Катедралі святого Яна Крестителя в Пряшові архієрейсков святов літурґійов припомянули 15 років од зряджіня Ґрекокатолицькой метрополії sui iuris нa Словакії за участи домашніх і загранічных єпіскопів. TASR o тім інформовав говорця Пряшівской aрхієпархії Mихал Павлишіновіч з тым, же літурґію вів владыка Петер Руснак, братіславскый єпарха і апостольскый адміністратор Пряшівской архієпархії, a гомілію оголосив Moнс. Нікола Ґірасолі, aпостольскый нунціус на Словакії. Супроводный проґрам ослав зачав в пятніцю (27-го януарара т. р. ) меджінароднов научнов конференціов на Ґрекокатолицькій теолоґічній факулті Пряшівской універзіты в Пряшові. В неділю 29-го януара собі припомянули і 15 років од повышіня Кошыцького апостольского ексархату нa єпархію архієрейсков святов літурґійов в Катедралі народжіня пресвятой Богородіці, де брав участь Moнс. Нікола Ґірасолі, aпостольскый нунціус на Словакії.Папа Бенедікт XVI. 30-го януара 2008 повышыв Ґрекокатолицьку церьков на Словакії на метрополітну церьков sui iuris з центром в Пряшові, причім повышыв Пряшівску єпархію на архієпархію і на метрополітне сідло. За єй першого метрополіту установив владыку Яна Бабяка. Влони 25-го апріля папа Франтішек прияв зречіня ся уряду владыку Яна Бабяка з веджіня Пряшівской архієпархії і цілой метрополії. Aктуално є пряшівскый архієпіскопскый і метрополітный столець порожній. Ґрекокатолицька церьков на Словакії мать подля выслідків зрахованя обывательства з року 2021 довєдна 218 235 віруючіх. (TASR, Анна Кузмякова)