Скоро 150 кілометрів через Пряшівскый край бы мала досягнути меджінародна  траса про ціклістів Eurovelo 11, котра поведе через 11 країн і буде довга 6 550 кілометрів. На єй будованю ся інтензівні робить, а будучій рік ся рахує з єй добудованьом до Шарішскых Міхалян. TASR o тім інформовала Леа Геілова з одділіня комунікації і пропаґації Уряду.  На докінчіня меджінародной трасы на теріторії краю хыбить іщі веце як половина. До днешнього дня містам і селам дали скоро 182.000 евр, звышок на будованя ціклотрасы самосправы мусять фінанцовати з властных  і европскых фондів. Eurovelo 11 бы мало продовжовати через Сабінівскый і Старолюбовняньскый окрес. В проєктовій приправі є  траса Стара Любовня – Хмельніца, далшы трасы в селах Леґнава, Малый Липник, Сулин і Мнішек над Попрадом суть уж зреалізованы. (TASR, Pkf)