Пряшівськый самосправный край (ПСК) чекать у звязку з проблемом затікаючой стріхы Музея модерного уменя Енді Варгола в Меджілабірцях на резултаты оглядкы. Паралелно працює на вырахуваню можной санації гаварійного ставу і наслідні прийме вердікт, ці ся буде стріха оправльовать іщі перед комплекснов реконштрукційов музеа. Про пресаґентуру TASR то увела говоркыня края Даша Єленьова. Стріха музея зачала затікати перед Рождеством. Часть творів перенесли до депозітаря, де суть про них створены добры условії з наставленов оптімалнов теплотов і вогкостьов. Дакілько творів пізніше переіншталовали до резервной выставной салы в рамках музея. На велику реконштрукцію єдиного музея свого тіпу в Европі, і єдного з двох на світі, выділила грошы іщі влада Петра Пеллеґріні на своїм выїздовім засіданю в Кежмарку в октобрі 2019-го року в цілковій сумі 7,1 міліона евр. Но почас робліня проєктовой документації, вдяка роснутю цін на ставебнім рынку, підняли ся інвестічны вытраты проєкту о майже 80 процент, значіть на веце як 12,7 міліона евр. ПСК мав діставати грошы в трьох транжах. Пришли першы дві і пак в юлі 2022-го року словацька влада хотіла зрушыти ціле узнесіня о фінанцованю реконштрукції музея найславнішого Русина. То ся наконець не стало, узнесіня зістало платне. Їднаня о реконштрукції і дофінанцованю робот тырвають. (ЛЕМ.ФМ,  TASR, Pkf)