Мадярьско остане і надале в тіснім контакті зо Словакійов при охрані націоналных інтересів. По вчерайшім телефонаті із шефом словацькой діпломації Юрайом Бланаром то на соціалній сіті Facebook увів мадярьскый міністер загранічных діл Петер Сійярто, інформує пресаґентура TASR. Представителі обідвох країн говорили о пропозиції Европской комісії (ЕК), котра рахує зо скончіньом довозу російского пліну до членьскых штатів до кінця року 2027. „Згодли сьме ся, же не можеме дозволити, жебы были загрожены нашы додавкы енерґії, і не можеме дозволити, жебы ціны енерґії в нашых країнах драматічно зросли,“ выголосив Сійярто. Подля мадярьского міністра є то „неприятельне загрожіня енерґетічной безпекы на політічно-ідеолоґічній основі,“ доповнив. Підкреслив, же обидві країны будуть продовжовати в тісній коордінації даных справ. (TASR, Пкф)