Місто Свідник актівно приправує локаліту „Ярабинкы“ про выставбу 38 родинных домів трьох тіпів. Місто уж мать архітектонічну штудію, котра указує можности забудовы. За словами пріматоркы Свідника Марцелы Іванчовой, і кідь є тота робота тяжка, місто ся значно посувать допереду. Є великый інтерес з боку потенціалных жытелів, в тім чіслі родин, котры бы ся хотіли вернути до Свідника. Архітектонічна штудія обсягує уміщіня домів, орґанізацію функчных зон на парцелах, а тыж вышку і форму забудовы. Локаліта є обколесена Памятником совітьской армії, польногосподарьсков земльов, драгов і шпортовыма обєктами. Місто тыж робить на проєктовій документації про комунікації (вода, каналізація, електрика, ґаз), драгы і пішникы. Одбывать ся і припомінкованя зміны теріторіалного плану. Місто приправує вебовый портал про заінтересованых. (TASR, Pkf)