В понедільок 30-го октобра 2023-го року одбыв ся в просторах засідалні Факулты гуманітных і природных наук Пряшівской універзіты (ПУ) в Пряшові 58-ый научный семінар карпаторусиністікы, котрый традічно орґанізовав Інштітут русиньского языка і културы ПУ і быв присвяченый недавно выданій публікації з назвов Александер Духнович: Моя ліра и кимвал, котрой головным упорядковательом є доц. Мґр. Валерій Падяк, к. н. Якраз Падяк, приготовив і реферат про участників научного цемінаря, в котрім припомянув, же публікація была выдана при нагоді 220-ой річніці од народжіня русиньского будителя Александра Духновіча, і акцентовав, як потрібне є Русинам познакомльовати ся з творами Духновіча і приближыти тоты творы і новым ґенераціям. Спомянута книжка была выдана при підпорі Світового конґресу Русинів (СКР), почас котрого одбываня в авґусті того року в Сербії была публікація презентована. І зато на презентації в Пряшові быв участный председа Світового конґресу Русинів Др. Штефан Лявинець. Семінар карпаторусиністікы першый раз ішов і до ефіру, а в найблизшых днях прибуде запис із семінара на онлайн платформах, де го буде мож цілый попозерати. (ЛЕМ.ФМ, Пкф)