Словацькый народный музей – Музей русиньской културы в Пряшові выголошує історічно-літературный конкурз під назвов Спознай своє русиньске коріня. До конкурзу можуть залучіти ся школярі другого ступня основных школ і штуденты середніх школ. „Школярі або штуденты можуть про даный конкурз написати історію свойой родины, свого села, міста, реґіону, можуть собі выбрати цалком конкретну історію о своїм дідови ці бабі, нянькови ці матери або далшых членах родины,“ інформує музей. „Можуть написати, як чують своє русиньске коріня, і хто їх ку чутю приналежности к Русинам вів в родині найвеце.“ Конкурз окрем віковых катеґорій – школярі другого ступня основных школ і штуденты середніх школ, має і окремы катеґорії тематічны, змагаючі ся можуть писати самы або в колектіві авторів. Музей як выголошователь конкурзу дав і можливость выбрати форму, змагаючі можуть написати опис, оповіданя, аналізу, історічне баданя, але мож зробити і інтервю або ся ку темі выразити у віршах. Писати мож по русиньскы або по словацькы. Конкурз буде проходити од 1-го октобра того року до 31-го мая 2026-го року. В місяці юн слідуючого року одбуде ся оцініня і выголошіня резултатів. Фінале конкурзу буде оціньовати жюрі в складі Наталія Гребікова, Марек Ґай, Люба Кральова, Петро Медвідь, Радка Ондеркова, Яна Трущіньска і Тімотей Федор. Пропозіції ку конкурз Спознай своє русиньске коріня в русиньскім і словацькім языку можете найти на інтернетовім сайті музея. (ЛЕМ.ФМ, Пкф)