Село Удол, Старолюбовнянского окресу, так як і іншы села нашого реґіону снажать ся робити вшытко прото,  жебы чісло жытелів в селі ся з рока на рік непонижувало. Днесь в Удолі жыє 363 обывателів і суть то передовшыткым віком старшы обывателі. Як про наше радійо Русин.фм староста села Удол Владіслав Кравець повів, хочуть дану сітуацію змінити і вытворити такы условія, абы передовшыткым молоды люде зачали ся вертати до Удолу. Як говорить староста села, же єднов з найосновнішых условій про їх привабліня є добра інфраштруктура і існіваня потрібных інштитуцій в селі, котры злекшують жывот нелем молодым людям в нім. З той причины найвекшым планом старосты села Удол  Владіслава Кравця є „привабити до села што найвекше чісло обывателів, главні молодых людей.  Про тот ціль хочеме на землях за сельскым гріском выбудовати інфраштруктуру про мінімалні 49 новых хыж. На тот ціль маме уж выпрацювану і штудію. Правдаже плануєме до будучности з будованям овельо векшым чіслом хыж.“ (Pkf)