В найвыходнішім ціпі Словакії на словацько-польско-україньскім троймеджі, під котов Кременець (1210 м н.м.), находить ся найрепрезентатівніша часть найвекшого спомеджі штирьох словацькых компонентів світовой природньой дідовизні Стары буковы лісы і пралісы Карпат і іншых реґіонів Европы, Стужіца – Буковы верьхы. Народна природна резервація  (NPR) Стужіца є зразком прімарных пралісів з поледового періоду, де дерева досягують вік на границі свойого дожытя. Праліс з 250-рочныма буками і 400-рочныма ялицями, котрый давать домів вшыткым великым шелмам жыючіх в словацькых лісох, є завдякы турістічным пішникам добрі приступный і верейности. Про пресаґентуру TASR то потвердила Івета Буральова зо Справы Народного парку (NP) Полонины. Ядрова зона найвекшого компоненту записаного в списку природньой дідовизні UNESCO на Словакії заберать 1742,26 га, охранне пасмо творить 5694,11 га. Сама NPR Стужіца з теріторійов 761,43 га є найвекшым словацькым пралісом. (TASR, Pkf)