Тісячі людей у віторок в сербскім Белеграді протестовали проти поліцайных засягів на універзітах. Тоты мали ключову роль при великых противладных протестах, котры в Сербії тырвають уж 15 місяців. Протестуючі зышли ся при будові Белеградьской універзіты з нагоды Народного дня освіты. На покійнім згромаджіню під назвов Знаня суть міць люди выразили підпору десяткам професорів, котрых вышмарили з роботы за участь на противладных протестах. Віторковый протест одбыв ся дакілько днів по тім, як порядкова поліція вышмарила протестуючіх штудентів із будовы єдной із факулт в Новім Саді. Реґуларны штудентами веджены протесты были выкликаны нещастьом на желінзнічній новозреконштруованій станіці в Новім Саді в новембрі 2024-го року, при котрім вмерло 16 людей. Жытелі Сербії суть пересвідчены, же траґедії помогла скорумпованость урядників, лаксность і недостаточный дозор на ставбі. Протесты вели ку резіґнації дакілько высокопоставленых політіків, включно премєра Мілоша Вучевіча.

(Медвідь, TASR)