Новым британьскым премєром і лідром Конзерватівной партії буде бывалый міністер заграничных справ і колишній староста Лондіна Боріс Джонсон. Інформувала о тім справодайска телевізія Sky News. Членове Конзерватівной партії собі  в голосованю поштов выберали меджі двома кандидатами, котрыма были Боріс Джонсон і днешній міністер заграничных справ Джеремі Гунт. На внутропартійнім голосованю поштов, котре ся одбыло од 6-го до 22-го юла, брало участь 87,4 процентів зо 160.000 членів Конзерватівной партії. Джонсонові дало свій голос 92.153 членів партії. Джонсон ся місця лідра Конзерватівной партії і британьского премьера ухопить по Терезі Мейовій, котра з місця лідеркы одступила 7-го юна. (TASR, Пкф)