Брітска премєрка Тереза Мейова вчера тісно програла важне голосованя в брітскім парламенті, котре ся дотуляло пропозиції закона о тзв. Брексіті. Посланці прияли позмінюючу пропозицію, на основі котрой будуть мати можность голосувати о конечній догоді меджі Споєным кральовством і Европсков унійов о выступліню з Унії. Інформувала о тім Пресова аґентура Словацькой републикы с тым, же проти сучасній дефініції пропозиції закона о выступліню з ЕУ ся взбурили посланці Мейовой Конзервативной партії. Позмінюючу пропозицію к такзваному закону о брексіті посланці одобрили 309 голосами, проти было 305. На сторону опозиції ся приклонили дакотры конзерватівны посланці і брітскому парламенту так заручіли у вопросі фіналной догоды о брексіті право вета. Влада твердить, же тота зміна може нарушыти гладку реалізацію выступліня з ЕУ.
(TASR)