Тісячі підпорьователів бывшого ґрузіньского презідента Михаіла Саакашвіліго в неділю вышли до уліць Києва і жадали пропущіня політіка. Поліція на місці не мусила засяговати. Інформовала о тім словацька пресова аґентура SITA. Саакашвілі подля слов свого правника іщі в суботу в арешті написав выголошіня, в котрім апеловав на людей, жебы ся не бояли і в неділю зорґанізовали мірный протест. Так само оголосив, же буде до одкликаня голодовати. Прихыльници політіка дали в неділю штири пожадавкы, котры жадають сповнити од Верьховной рады. Подля аґентуры ТАСС то в неділю на мітінґу оголосила членка політічного комітету Саакашвілім заснованого Руху новых сил Ольга Галабалова. Опозіція жадать приятя закона о імпічменті, приятя закона о вытворіню протикорупчного суду, схваліня закона о выборах в другім чітаню і одкликаня ґенералного прокуратора Юрія Луценка.
(Петро Медвідь)