Кідь ся Палестінчане хотять рушати допереду напрямом ку міру, мусять ся поставити перед реалность, же Єрусалим є головным містом Ізраіля. Выголосив то в неділю ізраільскый премєр Бенямін Нетанягу причім підкреслив, же Єрусалим є метрополов жыдівской державы уже 3000 років і „ниґда не служыв як головне місто іншого народа,“ цітує премєра портал станіці BBC. Выслов ізраільского премєра пришов в часі, коли проходять протесты в музулманьскім і арабскім світі проти рішаня презідента США Доналда Трампа признати Єрусалим за головне місто Ізраіля і поступно до нього перенести із Тел Авіву і америцьку амбасаду. Нетанъягу по вікендовій стрічі із франузькым презідентом Емануелом Макроном в Паріжі выголосив, же намагы запівперечати „тісячілітні повязаня із Єрусалимом суть абсурдны.“ Одкликовав ся при тім і на Біблію.
(Петро Медвідь)