Польскый презідент Анджей Дуда у віторок презентовав пропозіції вопросів про референдум о змінах в конштітуції. Презідент хоче, жебы плебісціт проходив в осени того року. Аґентура Associated Preess припомянула, же Дуда апелує на зміны конштітуції уже довшый час. Денник Gazeta Wyborcza пише, же Поляци бы ся мали выразити наприклад ку тому, ці бы конштітуція мала мати в преамбулі спомянуту тісячрічну хрістіаньску дідовизну Польщі і Европы. Меджі пропозіціями вопросів суть і такы, котры дотуляють ся підпоры родины, матерьства і вітцьовства, ґарантованя старостливости о жены в тяжи, людей зо здравотным гендікепом, сеніорів ці права на пензію у точно вставленого віку. Предметом референдума бы міг стати і вопрос односно ґаранції сувереніты Польщі в Европскій унії і першорядій позіції польской конштітуції над меджінародным і европскым правом, ці конштітучной ґаранції членьства державы в NATO.
(TASR)