Мадярьскы опозічны партії в намазі зосадити владну партію Fidesz премєра Віктора Орбана підуть до волеб в році 2022 зо сполочным проґрамом і кандідатами. В понедільок о тім інформовала аґентура Associated Press. Шість опозічных партій в неділю договорило ся, же у вшыткых 106-ох волебных округах представлять сполочный проґрам і выберуть єдного кандідата на премєра, і то посередництвом тзв. прімарок. Партії підкреслили, же ся не злучують, лем в намазі досягнути „зміну еры“ давають свої поглядовы незгоды боком. Подля бадань публічного мніня має шість опозічных партій вєдно векшу підпору як Орбанова партія о штири процентуалны пункты. Подобный договор опозіція зробила і перед комуналныма вольбами минувшого року, што їй помогло здобыти мандаты старостів і пріматорів ці посланців самосправ, включно веджіня в головнім місті.

(Медвідь, TASR)