Послове членьскых країн Европской унії в понедільок вечур доїднали ся на сполочнім паклику помочі в сумі 18 міліард евр про Україну в рамках пожычкы у 2023-ім році і на ґлобалній 15-процентній дані про наднародны фірмы. Іде о вызначный крок, котрым ся вырішыв і спор меджі Унійов а Мадярьском, яке тоту поміч ветовало. Догода 27 послів уможнює, жебы Будапешть дістала векшу часть обіцяных грошей з фондів Унії, котры были дотеперь блокованы з причіны скарг остатніх членьскых держав, же мадярьскый премєр Віктор Орбан одклонив ся од демократічной правной державы. Договор іщі мусять формално схвалити членьскы країны Унії, аж пак зачне быти платный, но комплікації при схваліню ся не очекують.

(Медвідь, TASR)