Ческый презідент Мілош Земан знова в середу атакував новинарїв. Высловився з дешпектом о їх інтеліґенції і высловив жаль над тым, же ся їх іші неподарило „выгубити„. Презідентовый выслов одзвучав в часі стрічі з амбасадорами на Пражскім граді, інформував сервер іДнес.цз, котрый припомянув, же Земан мать к новинарям довгочасове зневажуюче одношіня. „Єм пересвідченый, же інтеліґенція чеськых новинарїв є даколи на уровні дронта налітавого, што быв твір жыючій на Мадаґаскарі, але быв право выкіноженый. Чеськых новинарїв ся покы неподарило выкіножыти,“ закінчив Земан своє выступліня к амбасадорам, в котрім окрім іншого оцінив діяня чеськых вояків в Афґаністані. Ческы медія збачіли, же презідент собі наісно спліт остров, на котрім згадуваный нелітавый птах в минулости жыв. Правдов є, же то небыв остров Мадаґаскар, але остров Мавріціюс.