Европа днесь пережывать найгоршу епідемію пташачой хрипкы (H5N1). Выходить то з дани німецького Інштітуту Фріедріха Лоффлера (FLI). Інформувала  о тім днесь аґентура DPA. Новы сітуації прибывають на денній основі і подля німецького дослідницького інштітуту ся інфікація шырить нелем меджі вольні жыючіма птахами. Науковці твердять, же конець епідемії є недоглядно. Засягнуты суть країны од Фінландії через Фаерськы островы по Ірландію, од Росії по Портуґалію. Сітуації пташачой хрипкы ся обявили меджі птахами і в Канаді, Індії і выходній Азії. Наприклад, чеськы ветерінарі мусіли тот тыждень зліквідовати 80.000 курок на фармі, де до кінця минулого тыждня здохнуло на пташачу хрипку высше 100.000 курок, ознамила чеська Штатна ветерінарна справа. (TASR, Pkf)