Шефка діпломації ЕУ Кая Калласова у четверь навщівила Сербію а стрїтила ся з найвысшыма представітелями державы. Белеград вызвала на приятя ,,скуточных рефорем“ а бой проти корупції на забезпечіня покроку в намазї о членство в ЕУ. Інформує о тім TASR  подля аґентур AFP a Tanjug. На зачатку свого турне по балканьскых країнах Калласова вызвала Сербію на ,,крокы, котры потвердять і підпорять” єй стратеґічну амбіцію вступити до блоку. ,,Праві реформы доволять Сербії напредовати на пути до ЕУ,“ повіла на тисковій конференції. ,,Належить ку ним слобода медій, бой проти корупції, волебны реформы. Реформы мусять быти скуточны, не є то лем зашкыртаваня полічок на папірю,“ упозорнила. Серьбскый презідент Александер Вучіч на соціалній сїтї написав, же з Калласовов говорили і о згармонізованю загранічной і безпечностной політікы з постоём ЕУ.

(TASR, Шутіова)