Боснянскы Сербы вчера одсвяткували День Републикы сербской, контраверзне свято, котре є предметом силного одпору зо стороны іншых етнічных ґруп в Босні і Герцеґовины, котры тото свято поважують за діскріміначне. Інформувала о тім станіця Слободна Европа. День Републикы сербской ся вяже к 9-му януару 1992, кедь боснянскы Сербы выголосили на території розкладаючой ся Югославії властный штат, што выкликало в Босні і Герцеґовіні ліквідачну штирі річну войну з біланційов выше 100.000 мерьтвых і міліонів людей без стріхы над головов. І кедь Уставный суд Босны і Герцеґовины выголосив в новембрі 2015-го року тото свято за незаконне, ославы ся 9-го януара одбывають каждый рік.  (TASR, Pkf)