x

Подля Лаврова США не планують одыйти зо Сірії

00

Російскый міністер загранічных діл Серґей Лавров днесь выголосив, же Споєны штаты Америкы не мають задум одыйти зо Сірії наперек тверджіням Вашінґтону. Інформовала о тім російска аґентура „РИА Новости“. Лавров почас навщівы Кітаю новинарям повів, же має надію, же його контакты із французькыма партнерами пояснять, як співпрацовати на вырішіню сірійской справы. Шеф російской діпломації выразив ся і односно выголошіня міністрів загранічных діл семох найрозвитійшых промысловых держав світа G7, котры в понедільок на засіданю в канадьскім Торонті одсудили Росію, котра подля них підкопує меджінародне право. Міністры договорили ся і на вытворіню робочой ґрупы, котра бы мала роскрывати „шкодливе справованя“ Росії в повязаню з кроками Кремля на Україні і в Сірії. Лавров на то в Пекінґу зареаґовав, же мають „русофобне думаня“, доповнила інформацію російска аґентура.
(TASR)