Заступца северокорейской амбасады при Орґанізації споєных народів Кім Ін-рйонґ, в понеділок выголосив, же сітуація на Корейскім півострові “доспіла до різікового пункту і ядрова война може выпукнути в хоцькотру мінуту“. Кім Ін-рйонґ повів на засідані выбору Ґенералной Ансамблеї ОСН про одзброїня, же нияка держава на світі неє выставена „такому твердому і прямому ядровому застрашованю од Споєных штатів Америцькых як Северна Корея – і його держава мать право на самооборону“. Діпломат на основі прес-аґентур ДПА і АП увів, же Северна Корея ся тот рік стала “высокорозвинутов ядровов державов, котра мать средства ядрового атаку с різным досягом, як наприклад атомову, водікову бомбу і меджіконтіненталны балістічны стрілы“. Кім Ін-рйонґ варовав, же в їх дострілі ся находить ціла територія Споєных штатів і як їх США атакує, нияка часть світа неукникне їх твердому тресту.
(Петро Кімак-Фейко)