Снімовня репрезентантів америцького Конґресу вчера голосуваням 228:193 одобрила засланя пропозиції обжалобы на презідента Доналда Трампа до Сенату. Інформувала о тім аґентура AP. Снімовня так само одобрила зложіня сімчленного тіму демократичных заступників, котры будуть обгаёвати єй інтересы в процесі обжалобы презідента Доналда Трампа в Сенаті. Трамп пропозицію обжалобы вчера на Twitteri назвав за “дальше обдурёваня“ зо стороны демократів.

Поданя жалобы є повязане з обвиніням, же Трамп заставив америцьку воєньску поміч Україні, абы ю донутив зачати досліджуваня против його можному рівалові в будучорічных презідентскых вольбах Джоєнові Біденові і його сынові. (TASR, Pkf)