Шведьско і Фіньско ся завязали сполупрацовати з Турціёв а доказати єй, же ся не мусить бояти їх вступу до Североатлантічной аліанції. Увів то ґенералный таёмник NATO Йенс Столтенберґ у четверь на сполочній тисковій конференції з турецькым міністром загранічных дїл Мевлутом Чавушоґлом в Істанбулї. Інформує о тім TASR подля справы аґентуры AFP. Столтенберґ выголосив, же ,,є час привітати Фіньско і Шведьско як членів NATO“. Аґентура AFP припомянула, же турецькый презідент Рецеп Таїп Ердоґан винить Фіньско і Шведьско з додаваня безпекы курдьскым мілітантім, котрых Анкара поважує за терорістів.

(TASR, Шутіова)