Найменше десять жывотів собі выжадали сильны бурї і ними выкликаны заплавы, котры в часі вікенду засягли часті Італії, Франції, Австрії і Швейцарії. Векшыну жертв евідують в Італії, інформувала аґентура DPA. В Італії і Франції в суботу евідовали веце як 24 страченых осіб. Векшыну з них ся уж меджічасом подарило найти. Прудка бурка Алех ся в ночі на суботу перегнала горьскыма областями на юговыході Франції і северозападі Італії і была прічінов многоміліоновых шкод. Выкликала локалны заплавы, нічила мосты, перевертала авта, заблоковала путі і одрізала од світа многы горьскы села. (TASR, Pkf)