В рамках славностного засіданя Містьского представницьтва в Пряшові собі  вчера в історічнім будинку Парку културы і оддыху – Чорный орол перевзяли многы лавреаты обще оцініня міста. Передали ся по третій раз в історії міста. Як пріматорка міста Пряшова Андрея Турчанова повіла, „місто хоче даным кроком в першім ряді оцінити тых людей, котры приносять розвой міста.“ Ціну міста Пряшів за рік 2018 собі перевзяв еванґелічный священик Ян Бакалар, дітьскый кардіолоґ і довгорічный посланець Васіль Янко за ціложывотный  вклад в розвою в області педіатріцькой кардіолоґії і герецькый манжелскый пар Кветослава і Йозеф Стражановці за ціложывотный вклад в розвою театралного уміня і пропаґації міста Пряшів.  Пряшівскый еванґелічный священик Ян Бакаляр быв оціненый за пасторачну роботу, творчу і актівну роботу і захрану културной дідовизні в місті. Як про пресову аґентуру TASR повів, „єм передовшыткым вдячный за то, же дахто спостерегне собі обычайну, людьску службу, котру роблю в тім місті…“ Ціну Опалове зрнко міста Пряшів за рік 2018 за вклад в області обходу і будованя позитивного образу міста Пряшів здобыла компанія 3b, с.р.о.. Ціну пріматоркы міста Пряшів за рік 2018 здобыв актівный шпортовець Франтішек Беднар, прімар Крадіоцентра Факултного шпиталю з поліклініков Й.А. Раймана Ян Кмец і Основна умелецька школа Мікулаша Мойзеса на Баштовій улиці в Пряшові. (TASR, Пкф)