В понедільок 13-го фебруара 2023-го року одбыло ся засіданя Заступительства Пряшівского самосправного краю (ПСК). Крайскы посланці окрім іншого занимали ся схваліньом грошей на реконштрукцію Музея модерного уменя Енді Варгола в Меджілабірцях. Музей модерного уменя Енді Варгола од 2019-го року чекать на реалізацію великой реконштрукції. Тота є нелем барз потрібна, бо будова є планім стані, докінця до ньой вже затікать через стріху, але так само має дати музею цалком нову дімензію. Грошы на проєкт перебудовы музея схвалила словацька влада іщі в році 2019 в цілковій сумі 7,1 міліона евр. До того пришла пандемія, піднятя цін матеріалів і ставебных робот, а докінця і думкы новой влады зрушыти цілу дотацію. Музей при днешніх цінах вже рахує з тым, же на реконштрукцію треба понад 12 міліонів евр і крытя тых вытрат не мало дотеперь ґарантоване ани своїм зряджовательом, котрым є ПСК. Тото ся по понедільку змінило. Посланці єдномысельно на засіданю схвалили фінанчне крытя реконштрукції меджілабірьского музея в суму 12,28 міліона евр, з чого край має к діспозіції од державы 5,1 міліона і буде потребовати іщі 7,18 міліона евр. (TASR, Pkf)