На градї Чічва коло Воронова над Топлёв проходять протягом лїтнёй сезоны роботы на ёго обнові на многых частях. Як про TASR увів староста села Седліска Матєй Сабол, в повязаню з градом планують много проєктів, котрыx цїлём є підвышыти турістічну атрактівіту граду і села. Приготовлюють і реконштрукції пути, котра веде ку граду. В актуалній сезонї на градї обновили каверну у выходнім мурі югозападного палацового крыла а продовжують мурарьскы роботы на севернім боцї деловой башты. Подля выконного директора обчаньского здружіня Про футуро граду Чічва Любоміра Гутку ся реконштрукчны роботы реалізують традічныма поступами а з поужытём історічных матеріалів, наприклад малты, котру сі сами гасять. Обчаньске здружіня Про футуро граду Чічва ся захранї граду венує од року 2014. В сучасности реалізує роботы з народного проєкту Люде і грады- крок ку соціалній економіцї. ,,До проєкту, котрый буде до октобра 2025, сьме запоїли вісем робітників з уряду роботы, причім сім з них походить з містной ромской осады,“ доповнив Гутка. Навщівность граду ся в останїх роках підвышыла, протягом бежного вікенду го навщівить приближно 100 аж 150 турістів, при подїях і два раз тїко.

(TASR, Шутіова)