В Сабінові почали діґіталізацію выбраных історічных обєктів, котра має помочі заховати културну і історічну дідовизну. Як інформовав аґентуру TASR коордінатор 3D мапованя міста Павол Ваврек, при обєктах проходить детайлне збераня даных в екстерьєрі і інтерьєрі, і то за помочі дронів, статічных 3D сканерів ці шпеціалных камер. Діґіталізація реалізує ся в рамках проєкту з назвов Діґіталны рішіня про історічну дідовизну міст Ужгород і Сабінів, на котрый суть вырахованы кельчікы в сумі понад 332 тісяч вер, причім дашто высше 299 тісяч евр дала на проєкт як дотацію Европска унія. В Сабінові в рамках проєкту заміряли ся на історічный центер міста, містьску дзвоніцю, історічны містьскы муры, Римокатолицькый костел святого Йоана Креститаля, Євангелицькый костел і Римокатолицькый костел Дівы Марії. По діґіталізації в Сабінові буде робити ся тот процес в партнерьскім у тім проєкті місті – Ужгороді. Там ся буде діґіталізовати Ужгородьскый замок, котрый належыть меджі найнавщівльованішы памяткы, і в котрым має свою експозіцію Закарпатьскый музей народной архітектуры і бываня. Фото: Wikipedia/Йозеф Котуліч. (ЛЕМ.ФМ, Пкф)