Коалічна партія Hlas-SD мусить заплатити штроф 5000 евр за опізнене публікованя змлувы о пожычці з фірмов Element Business. Вырішыла о тім на понедільковім засіданю Державна комісія про вольбы і контролю фінанцованя політічных партій. Пожычка ішла на кампань перед презідентьскыма вольбами про сучасного презідента Петра Пеллеґріні. Подля вырочной справы партія минувшый рік евідовала єдну пожычку в сумі 300 000 евр од Element Business, котру прияла партія 26-го януара 2024-го року і сплатила 8-го октобра того самого року. Конательков фірмы є презідентова сестра Ева Пеллеґріні. Партія твердила, же інформацію о пожычці доповнила на вебсайт „безодкладно по тім, як інтернов контрольов пришли на то, же тот обовязок не быв сповненый“.

(Медвідь, TASR)