Коалічна SNS буде в будучности розвивати політічный притиск на цїлкове зрушіня трансакчной дани. Хоче тыж передложыти пропозіції на комплексну реформу данёвой сістемы. TASR о тім інформовала говоркыня страны Зузана Шкопцова. SNS припоминать, же од 1. януара переставать платити трансакчна дань про жівностників. ,,SNS є пересвідчена, же до будучности траба трансакчну дань зрушыти в цїлім розсягу а наслїдно приступити ку реформі дани з приданой годноты, як і дани з прийму,“ додала Шкопцова. З тым, же в области дани з приданой годноты буде SNS в будучности пересаджовати управу  на дві пасма, а то 10 а 20 процент. Ку дани з прийму SNS заставать назор, же бы мав быти ясно розлышеный режім зданёваня фізічных і правницькых особ. ,,Коло фізічных особ є цїлём досягнути высшу чісту мызду про обчанів, покы коло правницкых особ мать быти цїлём одстранїня данёвой демотівації коло подниканя,“ пояснили народняри.

(TASR, Шутіова)