В понедільок 27-го януара, точно 30 років од часу, коли одбыло ся святочне выголошіня кодіфікації русиньского языка на Словакії, Округлый стіл Русинів Словакії (ОСРС) зорґанізовав у столиці републікы – Братіславі, подію, котров Русины припомянули собі тот історічный момент. Подія проходила при памятній таблі на інтернатах Дружба, котра кодіфікацію припоминать, і котра была там одкрыта у 2013-ім році. Якраз в конґресовій салі інтернатів Дружба в Братіславі одбыло ся святочне выголошіня кодіфікації. По русиньскій гімні поклали ся ку памятній таблі вінці. Пак наслідовали приговоры. Наперед приговорив ся голова ОСРС Петро Штефаняк, по нім мав приговор председа Русиньской оброды на Словеньску (РОС) Мартін Караш. По приговорах председів докторандка Інштітуту русиньского языка і културы Домініка Новотна прочітала пару спомин єдного із головных кодіфікаторів – Василя Ябура. На кінцю заспоминав собі і Мілан Андраш, котрый довгы рокы быв председом Містной орґанізації РОС в Братіславі, і на святочнім выголошіню быв прямым участником.

(Медвідь)