Міністер здравотництва Владїмір Ленґварьскый (номінант OĽANO) схвалює тзв. очковачу лотерію. Хоцьяка мотівація є подля нёго добра. Повів то у четверь на бріфінґу в Долнїм Кубінї. Премєр Едуард Геґер (OĽANO) підчеркнув, же  іде о єден з кроків, котрым хоче влада охранити жытелїв перед третёв волнов пандемії. Подля ёго слов є Словакія єднов з першых країн Европской унії, котра робить превентівны крокы на то, жебы третя волна мала што найменшый засяг.  В реакції на крітіку дакотрых опозічных посланцїв в повязаню з лотеріёв повів, же ся не бранить лїпшым рїшїням, но заты їх не чує. Штат хоче фінанчно одшкоднёвати людей за то, же ся дали заочковати проти захворїню COVID-19. Подля міністра фінанцій Іґора Матовіча ся так мать дїяти через очковачу премію і спростредковательскый бонус.

            (TASR, Шутіова)