Партія ĽSNS решпектує вердікт Крайского суду в Банскій Быстіці к підпредседничкі мімопарламентного руху Progresívne Slovensko (PS) Ірені Бігаріові. Про пресаґентуру TASR то повів посланец парламенту Мартін Белускы з ĽSNS. ĽSNS мусить ся подля вердікту суду Бігаріові выправдати за неправдивы інформації, котры о ній публіковала у своїх новинках і на інтернетовій сторинці. Згодно ся мусить стримати подобных поступів і заплатити єй нагороду немаєтковой уймы 5000 евр. Пресаґентуру TASR о тім інформував діректор комунікачного одділіня PS Радован Холева. (TASR, Pkf)