Презідентка Словацькой републікы Зузана Чапутова днесь одлетіла на офіціалну навщіву до Бруселу, де абсолвує авдієнцію у краля і стрічі з представителями Европской унії і діпломатами. Презідентка в рамках свойой другой зо серії навщів має авдієнцію у белґійского краля Філіпа, далше суть напланованы стрічі з ґенералным секретарьом НАТО Єнсом Столтенберґом і председом Европской комісії Жаном-Клодом Юнкером. Чапутова стрітить ся і зо словацькыма діпломатами, котры заступають Словакію в Европскій унії і НАТО. В рамках проґраму є напланована і стріча з діскусійов зо Словаками, котры жыють і роблять в Бруселі. Минувшый тыждень презідентка абсолвовала свою першу загранічну навщіву в Чеській републіці, де єй прияв презідент Мілош Земан. Дотримала так традіцію, же новый презідент Словакії іде наперед до Чеськой републікы і новый презідент на пражскім граді навщівить як першу Словакію.

(Медвідь, TASR)