Асоціація шпыталїв Словакії позітівно оцїнює, же в наступнім роцї ся мають підвышити фінанції про резорт здравотницьтва, і же з них мають быти выкрыты підвышіня платів про здравотницькых і нездравотницькых заместнанцїв. На прессконференції то у четверь в Братїславі увів презідент асоціації Маріан Петко. Як дале увів, не видить як найщастнїшый крок, же хоць „на капіталовы средства, то значіть накуп здравотницькой технікы ці оправу будов є в наступнім роцї має быти выдїлена найвысша сума, 100 міліонів евр, но што ся нам на тім не любить і не сьме з тым согласны, же тоты фінанції мають іти лем до 13-ёх штатных шпыталїв а до вшыткых другых, то значіть до 90-ёх далшых шпыталїв тоты грошы не мають іти. Но мы говориме, же обчан СР, пацьєнт і данёвый поплатник є лем єден а тот самый нарок як пацьєнт в Кошыцях, Пряшові ці Попрадї бы мав мати і пацьєнт в Гуменнім, Воронові а у вшыткых іншых містах, де шпыталї суть.“ Міністерство здравотницьтва СР реаґовало, же капіталовы вытраты ідуть пріорітно до кінцёвых здравотницькых заряджінь, котры лїчать найважнїшы а економічно найвеце нарочны припады.
(TASR, Цітрякова)