У віці 88 років вмер в понедільок Папа римскый Франціск. Оголосив то кардінал Кевін Феррелл. Вселеньскый архієрей вмер лем день по тім, як на Неділю Пасхы уділив традічне благословліня Urbi et Orbi – місту і світу. Голову Католицькой церькви перед нецілым місяцьом пропустили із Шпыталю Джемеллі в Римі до домашнього лічіня. Госпіталізованый быв 14-го фебруара з бронхітідов, котра пак переросла до запалу плюц. Папа Франціск быв головов Католицькой церькви од 2013-го року, коли папского уряду зрік ся Папа римскый Венедікт XVI. Франціск веце раз лічів ся на респірачны хвороты. Послідні рокы мав проблемы і з ходжіньом. Похованый, подля властного желаня, буде в базиліці Santa Maria Maggiore в простім гробі.

(Медвідь, TASR)