Еврокомісарка про розшыріня Марта Косова у вівторок підчас розговору про Европску редакцію (ENR) высловила підпору протестуючім Серьбам проти владной корупції і за посилніня прінціпу правного штату. Балканьска країна ся подля ньой мусить „вернути на европску драгу“, інформує о тім аґентура AFP. Сербія в тім часі пережывать період найсилнійшых протестів од 90-ых років 20-го стороча выкликаных зрушіньом бетонового притулку на зреконштруованій желізнічній станиці в Новім Саді. При траґедії 1-го новембра 2024-го року загынуло 16 людей, найвеце то было штудентів. Часть серьбской публікы прічіны траґедії споює з корупційов, котра в країні подля них овпливнює каждоденный жывот, діяня владных інштітуцій і выставбу. Під тиском протестів уж одступило пару серьбскых представителів включно з премєром Мілошом Вучевічом. (TASR, Pkf)