Словацька влада на пост еврокомісаря в будучім зложіню Европской комісії на рокы 2024-2029 підпорує сучасного підпредседу екзекутівы ЕУ Мароша Шефчовіча. Увів то председа влады СР Роберт Фіцо по скончіню міморядного двойднёвого саміту ЕУ в Бруселї, інформує о тім справодайця TASR. На вопрос, ці мать словацька влада в залозї кандідатів мужского і женьского поглавя на пост будучого еврокомісаря про припад, же новый шеф або шефка Европской комісії таку жадость передложыть, Фіцо припомянув, же Словакія мать теперь в екзекутіві ЕУ у функції підпредседу меджінародно узнаваного і фундованого чоловіка. Уточнив, же Шефчовіч в еврокомісії служыть уж третїй повный мандат а кедь бы прияв далшу понуку, буде то ёго четвертый цїлый період. Штири повны мандаты дотеперь в історії ЕУ незаставав жаден еврокомісарь.

(TASR, Шутіова)