Поліцайный засяг в Коларові ся у четверь курто перед 18,00 год. скінчів. Колона поліцайных авт опустила Гарчову уліцю, причім в єднім з авт сїдїв і Томаш С., єден зо затриманых в припадї вражды новинаря Яна Куцьяка і ёго приятелькы Мартіны Кушнїровой. Поліція у четверь рано затримала вісем особ підозрїлых з насилных карных актівіт звязаных з Куцьяковов враждов. Близшы інформації не хоче поліція ани ґенерална прокуратура давати а жадать новинарїв о стриманость при інформованю. О припаднім арештнім їднаню бы мав судця розгоднути найпізнїше до понедїлька 1. октобра. Презідент Андрій Кіска в реакції на затриманя підозрілых: „Хотїв бы єм заґратуловати, але главно подяковати вшыткым тым, котры робили на тім, же ся подарило затримати людей підозрілых з укладной вражды двох молодых людей. Од зачатку по тій враждї єм вецераз верейности повів а убеспечів єй, же єм пересвідченый як презідент, же сьме на вышетрёваня насадили тых найлїпшых людей.“
(tasr, Цітрякова)
Фото: TASR