Сумов 1,43 міліонів евр перерозділить влада СР селам і інштитуціям в окресі Ревуца, котрый патрить меджі найменше розвинуты. Кабінет о тім вырішыв на вчерайшім выяздовім засіданю в окреснім місті, де ся занимав реалізаційов акчного плану розвоя окресу Ревуца.  Актуалный план, котрый рахував перерозділити єден міліон евр, звышыв кабінет о вклад 30.000 евр про Музеум Першого словацького ґімназія в Ревуцій і дальшых 400.000 евр про ревуцькый шпиталь. З актуального міліона евр достане найвекшу часть місто Ревуца, конкретні 200.000 евр, котры підуть на реконштрукцію доріг і пішників. На накуп комуналной технікы про містьску компанію в Торналі є одобреных 100.000 евр а про каштель в Ліцінцях є призначеных 90.000 евр. Як премьєр СР Петро Пелеґріні при своїй навщіви повів, „ влада є уж ту  по третій раз за 2,5 рока бо єм приобіцяв, же як  буде можность так до рока знову прийдеме, абы сьме віділи як ся дарить окресу Ревуца по послідній нашій стрічі. Мушу повісти, же і в Ревуцій є видно, же шпеціалны акчны планы мають своє місце. Міра безробітя, котра ту даколи представувала была высше 32,5 процентів, днесь є на уровні коло 13,7 процентів і тренд є позитивный.“ (ТАСР, Пкф)