Рух Sme rodina хоче в найблизшім періоді просаджовати безодкладну поміч гіпотекарьным довжникам, котрым кінчіть фіксація і їх сплаткы можуть нароснути о стовкы евр. Плановали в тій справі їднати з банками і доїднати меморандум о тій помочі. Но подля слов председы руху і Народной рады Словацькой републікы Бориса Коллара ся представителі Словацькой банковой асоціації не хотять стрітити. Додав, же покля не дійде ку договору, можуть быти правила з боку штату і надіктованы. Словацька банкова асоціація на высловы Коллара реаґовала, же ся не зохабить втягнути до передволебной кампани окремых політічных партій. У співпраці з Міністерством фінанцій і Народнов банков Словакії асоціація подля властных выражінь аналізує і переоцінює різіко неспособности сплачаня пожычок на бываня, котре є і далше низкым. В припаді потребы є асоціація вєдно з банками приготовлена помочі кліентам банк, котры бы мали проблемы із сплачаньом.

(Медвідь, ТASR)