Рішіня о тім, як буде COVID автомат продовжовати, є передчасне. Робиме на тім, жебы штонайвеце окресів стало зеленыма, пак можеме бісідовати о даякім выключіню. В понедільок то выголосив премєр Едуард Геґер. Реаґовав тым на то, же на Словакії суть першы два зелены окресы, обмеджіня в них бы ся могли одстранити, покля бы ся „выключів“ COVID автомат. В документі має быти условія, же автомат ся выключіть втогды, кедь Світова здравотницька орґанізація повість, же пандемія скінчіла. Геґер додав, же є барз добре, же днесь рядиме ся реґіоналныма параметрами. Перемогов подля нього буде, кедь ціла Словакія буде зелена. Припомянув, же влада ся приготовлює на осінь, жебы ся поучіла із вшыткых хыб і забезпечіла такый сценарь, в котрім будуть в припаді потребы обмеджіня мінімалны.

(Медвідь, TASR)