Неґатівне одношіня против Ромів одкрыто высловлює  на Словакії третина опрошеных, наспак позітівне одношіня мать лем 5 процент. Дальшых 61 процент ся высловило неутрално. Крітічно реаґують главні жытелі выходной Словакії і Братіславского края. Выходить то з децембрового дослідженя аґентуры Focus про Уряд уповномоченого влады СР про ромскы комуніты. З анкеты дослідженя, в котрім одповідало 1022 респондентів, ся неґатівно против Ромів найчастіше высловлювали жытелі Кошыцького (42), Братіславского (38) і Пряшівского края (36 процент). Наспак, в Тренчаньскім краю было неґатівных реакцій значно менше нелем в порівняню зо споминаныма реґіонами, але і цілословеньскым середнім чіслом (18 процент).  (TASR, Pkf)