Міністерство жывотного окружіня СР не планує підпоровати выставбу ветерных парків. Хоче мати над тым силну контролю, а зато буде ветерны паркы посуджовати словацька іншпекція жывотного окружіня, під котру спадають найстрогішы посуджованя. Шеф енвірорезорту Томаш Тараба (номінант SNS) о тім інформовав на соціалній сїтї. ,,Уж в минулости єм дефіновав, же условія будути строгішы і в процесі, кедь ся буде выжадовати суглас сел, суглас превадзкователїв преносовой суставы з напоїнём  а многы іншы,” підкреслив Тараба. Твердить, же од свого наступу на міністерство невыдав жадне поволїня на выставбу парків. Попередня влада ся подля Тарабу в планї обновы завязала поставити дві зоны, де ветерны паркы мають стояти. ,,Не є то рїшіня моє ани нашой влады, але попереднёй влады. Тверджіня, же тых зон мать быти 25, не є правда,“ сконштатовав.

(TASR, Шутіова)