Кондіція дісціплінарного судництва на Словакії є недостаточна наперек тому, же іде о єдно з основных условій незалежного судництва. Презідентка Зузана Чапутова то выголосила в понедільок по стрічі з предсидательков Найвысшого суду Словацькой републікы Даніелов Швецовов. Тота повіла, же не знать, чом суть дісціплінарны сенаты нефункчны, бо не іде о компетенцію Найвысшого суду. „Судна міць на Словакії є тіпічна высоков міров незалежности, што є правилне, то конштітучна пожадавка. Но судництво буде фунґовати втогды добрі, кедь тота высока міра незалежности буде фунґовати якостнов одповідностнов сістемов і то має забезпечіти головно дісціплінарне судництво,“ повіла презідентка. На стрічі была одкрыта і тема наступника Даніелы Швецовой, котрій в октобрі кінчіть мандат. Презідентка бы на тім місці хотіла чоловіка з высокым моралным кредітом.

(Медвідь, TASR)