Днесь 4-го новембра минуло 20 років од вбивства штудента Даніела Тупого. Іде о доднесь о незакрыту історію, з котров ся споює проявліня неонацізму, при чім поліція робила і з верзійов, же участниками вбивства могла быти і мафія. Покы было обжалованых пять особ, котры в юні 2009-го року Окресный суд Братіслава І ослободив. Од року 2023 є з вбивства Тупого обжалованый Адам П. Даніела Тупого, 21-річного штудента Філозофічной факулты Універзіты Коменского в Братіславі, котрый походив зо Жіліны, забили 4-го новембра 2005-го року. У вечурніх годинах ся находив із далшыма штудентами на братіславскім Тыршовім набрежі при петыржалскім берегу Дуная. Його і далшых штудентів напала ґрупамужів озброєных ножами. Тупый отримав вісем бодных ран, на наслідкы котрых вмер. Далшых шіст людей было пораненых, єден тяжко. (TASR, Пкф)