Рік 2026 приносить новинку в області поуказаня дани з приймів. Фізічны особы будуть мати можность першый раз поуказати 2 % із заплаченой дани і своїм родичам. Цілы дві процента буде можне надале веновати і незисковым орґанізаціям. Інформовав о тім у вівторок говорця фінанчной справы (FS) Даніел Ковач. Новинка выходить зо закона о дани з приймів і тыкать ся поуказаня поділу заплаченой дани за рік 2025. Даньовник може даровати 2 % заплаченой дани єдному родичови і 2 % другому родичови. „Основным условійом є, же дань мусить быти рядні заплачена і даньовник мусить подати даньове признаня, або пожадати заместнавателя, котрый му зробить річне зучтованя дани в законом становленій леготі,“ приближыв Ковач. (TASR, Пкф)